ԱՀ կառավարման համակարգում կարևորագույն օղակներից մեկը հանդիսացող ԱՀ էկոնոմիկայի և արտադրական ենթակառուցվածքների նախարարությունը, կիրառելով իր տիրապետման տակ գտնվող գործիքակազմը, կոչված է ապահովելու տնտեսական աճի բարձր տեմպերի համար անհրաժեշտ պայմաններ` որպես երկրի կայուն զարգացման կարևորագույն գրավական:
Տնտեսական զարգացման քաղաքականության ոլորտում հիմնական թիրախը երկրի տնտեսության մրցունակության բարձրացումն է՝ իրական հատվածում նորարարությունների ներդրման հնարավորությունների մեծացման, արտադրողականության և բարձր ավելացված արժեք ձևավորող աշխատատեղերի աճի, նորագույն արտադրությունների և տեխնոլոգիաների յուրացման միջոցով:
Արցախի տնտեսական զարգացման օրակարգը պահանջում է նախ և առաջ նոր պայմաններում երկրի կարողությունների հստակ գնահատում, ռեսուրսների նպատակային ուղղորդում ու արդյունքին կողմնորոշված կառավարում, արտաքին ցնցումներին դիմակայելու կայուն երաշխիքների ձևավորում: Տնտեսական զարգացման նշված շրջանակում այսօր շեշտադրվում են քաղաքականության հետևյալ անկյունաքարային ուղղությունները.
– մրցակցային տնտեսության զարգացման և ձեռնարկատերերի համար հավասար մրցակցային պայմանների ապահովում,
– բարենպաստ գործարար միջավայրի ապահովում, ներդրումային գրավչության բարձրացում և մասնավոր ներդրումների խթանում,
– երկրում ստեղծագործ մարդկային կապիտալի ներուժի իրացում,
-գիտելիքի և նորարարության խթանում, նորարարական տեխնոլոգիաների ներգրավվածության ընդլայնում,
– տարածքային համաչափ զարգացում, քաղաքի և գյուղի միջև գոյություն ունեցող տնտեսական ակտիվության անհավասարության կրճատում,
– նոր աշխատատեղերի ստեղծման, տեղական արտադրողի գործունեության խթանման քաղաքականության իրականացում,
– տնտեսության դիվերսիֆիկացում` տնտեսության կառուցվածքում արտահանելի հատվածների տեսակարար կշռի ավելացման միջոցով,
– արդյունաբերության մրցունակության բարձրացում,
– ՓՄՁ պետական աջակցության նոր գործիքների կիրառում,
– տնտեսական աճին միտված կայուն և հուսալի արտադրական ենթակառուցվածքների զարգացում,
– երկրի տնտեսական անվտանգության ապահովմանն ուղղված ծրագրերի իրականացում:
Տնտեսական քաղաքականության այս շրջանակում է, որ հնարավորությունների ու կարողությունների անընդհատ ընդլայնումն ու կատարելագործումը կհանգեցնեն հասարակության կյանքի որակի բարձրացման և հնարավորություն կտան ամրագրել Արցախի ուրույն տեղը համաշխարհային տնտեսությունում:
Արցախի Հանրապետությունում տնտեսական զարգացման քաղաքականության մշակման ուղղությամբ աշխատանքներն իրականացնում է ԱՀ էկոնոմիկայի և արտադրական ենթակառուցվածքների նախարարության աշխատակազմի տնտեսական զարգացման վարչությունը, հեռ` (+374 47) 94-29-52, էլ. փոստ development@armei.am
